Suryagayatri സൂര്യഗായത്രി - ഇത് മാത്രമാണ് പ്രണയം

ഇത് മാത്രമാണ് പ്രണയം

http://suryagayatri.blogspot.com/2006/04/blog-post_10.html	Date: 4/10/2006 10:11 AM
	Author: സു | Su

ആകാശം ഭൂമിയെ പ്രണയിച്ച മഴയിലേക്കാണവള്‍ ഇറങ്ങി നടന്നത്‌.

അവളുടെ മേനിയിലും മനസ്സിലും മഴ പെയ്യുകയായിരുന്നു.

അവള്‍ അറിഞ്ഞില്ല. ഉള്‍ക്കൊള്ളാന്‍ ശ്രമിച്ചില്ല.

അവനായിരുന്നു അവള്‍ക്കെല്ലാം.

മറ്റുള്ളവര്‍ പൂക്കളും പൂക്കൂടകളും അവനുനേരെ മത്സരിച്ച്‌ നീട്ടിയപ്പോള്‍ അവനുവേണ്ടി മനസ്സിലൊരു പൂന്തോട്ടമൊരുക്കി പൂവുകളെ നോക്കി പുഞ്ചിരിച്ചു അവള്‍.

പൂന്തോട്ടമുള്ളൊരാ മനസ്സ്‌, പക്ഷെ ആരും കണ്ടില്ല.

പൂക്കൂട നീട്ടി അവന്റെ ഹൃദയം നേടി മറ്റൊരാള്‍ പോയപ്പോള്‍ അവളുടെ നൊന്ത മനസ്സും ആരും കണ്ടില്ല.

പൂന്തോട്ടം നിശ്ചലമായതുപോലെ അവള്‍ക്ക്‌ തോന്നി. അവള്‍ എങ്ങോട്ടെന്നില്ലാതെ ഇറങ്ങി നടന്നു.

ആകാശം ഭൂമിയെ പ്രണയിച്ച മഴയിലേക്കാണവള്‍ ഇറങ്ങി നടന്നത്‌.

അവള്‍ അവനെ ഓര്‍ത്തുകൊണ്ടിരുന്നു. മനസ്സു വാടാതിരിക്കാന്‍.

മനസ്സിലെ പൂന്തോട്ടം നശിക്കാതിരിക്കാന്‍.

പൂക്കള്‍ കരിഞ്ഞു പോകാതിരിക്കാന്‍. ‍

പാതി വിടരുമ്പോള്‍ കൊഴിയുന്ന പൂവാണ് പ്രണയം എന്നെഴുതിയ കവിവാക്യം അര്‍ത്ഥശൂന്യമെന്ന് തെളിയിക്കാന്‍.

അവളുടെ മേനിയിലും മനസ്സിലും മഴ പെയ്യുകയായിരുന്നു. അവള്‍ അറിഞ്ഞില്ല.

അവള്‍ അവനോടൊപ്പമായിരുന്നു.

മനസ്സിലെ പൂന്തോട്ടത്തില്‍.