മൌനം - കൃഷ്ണഗീതം

കൃഷ്ണഗീതം

http://swathwam.blogspot.com/2006/04/blog-post.html	Date: 4/8/2006 8:31 PM
	Author: ഇന്ദു | Indu

മഴക്കൊഞ്ചല്‍ താളമേറ്റി
മഴമേഘച്ചേല ചുറ്റി
മണിപ്പൂങ്കുഴലൂതിയെന്റെ
ശ്യാമവര്‍ണ്ണാ ഓടിവാവാ

ഇലച്ചാര്‍ത്തിന്‍ താളമേളം
ഇലഞ്ഞിപ്പൂ ചോടു വെച്ചു
ഇളംതെന്നല്‍ ശ്രുതിയേകി
ഇനിയാടാന്‍ ഓടിവാവാ

മുരളിയൂതി നീ വരുമ്പോള്‍
അരളിവനപ്പൂക്കടവില്‍
അരികിലിരുന്നൂയലാടാന്‍
ആശയെനിക്കേറെയല്ലോ!

നറുവെണ്ണക്കുടമുണ്ട്‌
ഉറതൈരുമേറെയുണ്ട്‌
ഉരുളയാക്കി മാമമുണ്ണാം
അരുമയല്ലേ, നീ വരില്ലേ?

നീലവാനിന്നഴകുള്ളോന്‍
നീയെനിക്കെന്‍ കണ്ണനല്ലോ
ഞാന്‍ ജപിച്ചാല്‍ കേള്‍ക്കയില്ലേ?
ഞാന്‍ വിളിച്ചാല്‍ നീ വരില്ലേ?