Suryagayatri സൂര്യഗായത്രി - മോഹങ്ങള്‍

മോഹങ്ങള്‍

URL:http://suryagayatri.blogspot.com/2006/11/blog-post_21.html	Published: 11/21/2006 10:34 PM
	Author: സു | Su

മനസ്സില്‍, വലിയ ഭാരവും തൂക്കി,

കൈയില്‍, അതിനേക്കാള്‍ ഭാരവും തൂക്കി നടക്കുന്ന മനുഷ്യന്‍ വിചാരിച്ചു.

വാഹനങ്ങളെന്തെങ്കിലും ആയാല്‍ മതിയായിരുന്നു.

ഇങ്ങനെ, കൊണ്ടുപോകുന്നിടത്തേക്ക്, നയിക്കുന്നിടത്തേക്ക്,

വെറുതേ ഒഴുകിനീങ്ങിയാല്‍ മതിയായിരുന്നു.

ഓട്ടോറിക്ഷ, തന്നെക്കടന്ന് കുതിച്ച് പായുന്നത് കണ്ടപ്പോള്‍,

കാറിന് നിരാശ തോന്നി.

ഒരു ചക്രം പിണങ്ങിയതുകൊണ്ടല്ലേ, താനിവിടെ കിടക്കുന്നത്,

ഓട്ടോറിക്ഷ ആയാല്‍ മതിയായിരുന്നു.

ട്രാഫിക് ജാമില്‍പ്പെട്ട് , കാത്തുകിടക്കുമ്പോള്‍,

വാഹനങ്ങള്‍ക്കിടയിലൂടെ മുന്നോട്ട് പായുന്ന, സൈക്കിള്‍ നോക്കി,

ഓട്ടോറിക്ഷ നെടുവീര്‍പ്പിട്ടു. സൈക്കിള്‍ ആയിരുന്നെങ്കില്‍,

മുന്നില്‍പ്പോയി നില്‍ക്കാമായിരുന്നു.

അടച്ച ഗേറ്റിനു മുന്നില്‍, തീവണ്ടി പോകാന്‍ കാത്തുനില്‍ക്കുമ്പോള്‍,

സൈക്കിളിനു ദേഷ്യം തോന്നി.

തീവണ്ടി ആയിരുന്നെങ്കില്‍,

മറ്റുള്ളവയെ കാത്ത് നില്‍പ്പിച്ച്,

ഗമയില്‍ കടന്നുപോകാമായിരുന്നു.

മണിക്കൂറുകളോളം സിഗ്നല്‍ കിട്ടാതെ, യാത്രക്കാരുടെ ദേഷ്യം കണ്ട്,

നിവര്‍ന്നുകിടക്കുമ്പോള്‍, തീവണ്ടിയ്ക്ക് തോന്നി,

മനുഷ്യന്‍ ആയാല്‍ മതിയായിരുന്നു.

ഒരു ഉത്തരവാദിത്തവുമില്ലാതെ, കൈയും വീശി,

നടന്നുപോകാമായിരുന്നു.

തീവണ്ടിയുടെ ചിന്ത കേട്ടറിഞ്ഞ ദൈവം ചിരിച്ചു.

എന്നിട്ട് പതുക്കെപ്പറഞ്ഞു.

“ആടറിയുമോ അങ്ങാടി വാണിഭം?”

Buzz It!	Feed Home	Article
Good Article? Buzz It!	Publisher's Site	To View / Comment